TaSUBa YAINGIA MAKUBALIANO NA SHIRIKA LA UTANGAZAJI TANZANIA (TBC)

Posted on: June 19th, 2021

TAASISI ya Sanaa na Utamaduni Bagamoyo (TaSUBa) imeingia makubaliano na Shirika la Utangazaji Tanzania (TBC) ili kukuza, kuboresha na kutangaza Sanaa na Utamaduni wa mtanzania.

Akizungumza jana mjini Dodoma mara baada ya kusaini makubaliano hayo Hafla ya utiaji saini huo, imefanyika Dodoma tarehe 19 Juni, 2021 katika  ofisi za TBC,Mkuu wa TaSUBa Dk. Herbert Makoye, alisema makubaliano hayo yataisaidia taasisi hiyo  kutengeneza maudhui katika maeneo wanayoshughulikia.

Dk. Makoye alisema kupitia makubaliano hayo TBC watatengeneza vipindi vya runinga  kwa njia ya tamthilia, hatua ambayo ni muhimu katika kufikisha ujumbe kwa wananchi.

Alisema kutengeneza tamthilia ni njia nzuri yakutangaza lugha  ya Kiswahili na Utamaduni wa mtanzania.

Dk. Makoye aliongeza kuwa utengenezaji wa tamthilia utaisaidia TaSUBa kuonyesha kazi wanazofanya na mchango katika taifa na utamaduni.

"TaSUBa ina malengo ya kusaidia utamaduni  wa mtanzania uvuke mipaka kwa kutumia vyombo vya habari vyenye nguvu ili kuzifikia ncho jirani  wasifikiri sisi ni wa kupokea tu tamaduni zao"alisema.

Aidha, makubaliano hayo yatawapa nafasi wanafunzi TaSUBa kufanya mazoezi kwa vitendo wakiwa na uhitaji  huo.

Kwa upande wake Mkurugenzi wa TBC Dk.Ayoub Rioba alimshukuru Mkuu wa TaSUBa kufuatia makubaliano hayo.

“TBC dhima yetu ni kuhakikisha kwamba tunaendeleza na kudumisha Utamaduni, kwa sababu utamaduni kama alivyowahi kusema Baba wa Taifa Hayati Mwalimu Julius Nyerere kuwa ni vyenzo muhimu  katika kumuendeleza binadamu, taifa lisilo na utamaduni ni sawa na lililokufa” alisema.

Dk. Rioba alisema TBC wanatambua   mchango wa TaSUBa katika kuendeleza utamaduni wa mtanzania.

Dkt. Rioba alisisitiza, “baada ya kusaini makubaliano haya kazi ya kuanza kuandaa kazi kazi za Sanaa itaanza mara moja ili zianze kuruka katika vyombo vyetu ambavyo ni redio, televisheni ambayo inaweza ikawa ni TBC1, TBC 2 na mitandao ya kijamii.”alisema.

Aidha Dk. Rioba aliongeza kuwa anaamini nia waliyonayo TaSUBa na TBC ni ya dhati na wote tunapenda kuona tunaendeleza Utamaduni wetu.