BODI YA USHAURI TaSUBa YAANZA KAZI RASMI

Posted on: July 7th, 2022

BODI ya Ushauri (MAB) ya Taasisi ya Sanaa na Utamaduni Bagamoyo (TaSUBa) imefanya kikao chake cha kwanza Julai 06, chini ya mwenyekiti wake Bw. George Yambesi ambaye ni Katibu Mkuu Mstaafu, Ofisi ya Rais Menejimenti ya Utumishi wa Umma na Utawala Bora.

Bw. Yambesi ametoa shukrani kwa Waziri wa Utamaduni, Sanaa na Michezo Mhe. Mohamed Mchengerwa kwa kuwaamini na kuwateua kuwa wajumbe wa bodi hiyo.

“Tunamshukuru Waziri kwa uteuzi huu na tunaahidi kufanya kazi kwa weledi na nguvu zote ili kuleta tija na ufanisi katika kuijenga TaSUBa,” amesema Yambesi.

Vile vile Bw. Yambesi amemshukuru Mkuu wa Chuo Dkt. Herbert Makoye na menejimenti yote kwa mapokezi mazuri waliyowapa na kuahidi ushirikiano kwa uongozi wa chuo pamoja na wadau wengine wa sanaa.

Mwenyekiti Yambesi amewapongeza pia wajumbe wote wa bodi kwa kuteuliwa na kuwa sehemu katika mchango wa kuleta tija katika chuo hicho cha sanaa chenye ubora uliotukuka Afrika Mashariki katika kutoa mafunzo ya sanaa na utamaduni.    

Naye Mkuu wa Chuo Dkt. Herbert Makoye kwa niaba ya Taasisi ya Sanaa na Utamaduni Bagamoyo, ameipongeza Bodi na kuwashukuru wajumbe kwa kukubali uteuzi huo.

“Menejimenti tuko tayari kufanya kazi na kutekeleza maelekezo ya bodi kwa kufanya kazi pamoja ili kufikia malengo yaliyofanya Serikali ifungue chuo hiki,” amesema Dkt. Makoye.   

Wajumbe wa Bodi hiyo ambao ni Prof. Omary Halfa Mbura, Bw. Haruni Benge Matagane, Dkt. Elizabeth Godwin Mahenge na Dkt. Emmanuel Mwesiga Ishengoma,  waliteuliwa na Waziri wa Utamaduni Sanaa na Michezo Mhe. Mohamed Mchengerwa Machi 25, 2025.