DC Ndemanga awataka TaSUBa kushirikiana na wadau.

Posted on: November 1st, 2026

Mkuu wa Wilaya ya Bagamoyo, Shaibu Ndemanga, amewataka waandaaji wa Tamasha la Kimataifa la Sanaa na Utamaduni Bagamoyo pamoja na matamasha mengine nchini kufungua milango kwa wadau wengi zaidi ili kuimarisha ushirikiano katika maandalizi na uendeshaji wa matukio hayo.

Ametoa wito huo wakati wa kilele cha Tamasha la 44 la Kimataifa la Sanaa na Utamaduni Bagamoyo, lililofanyika katika viwanja vya Taasisi ya Sanaa na Utamaduni Bagamoyo (TaSUBa), mkoani Pwani, kuanzia Oktoba 28 hadi 31, 2026.

Ndemanga amesema ushirikiano wa wadau ni muhimu katika kukuza matamasha na kuongeza mchango wake kwa Taifa, akibainisha kuwa changamoto katika maandalizi na uendeshaji wa matukio makubwa haziwezi kuepukika.

“Niwaombe waandaaji wa tamasha hili na matamasha mengine waendelee kufungua milango ili kukaribisha wadau wengi wa kushirikiana nao kuendesha matukio haya muhimu sana kwa Taifa letu,” amesema.

Aidha, ameupongeza uongozi, wafanyakazi, wanachuo wa TaSUBa na kamati za maandalizi kwa juhudi zao za kuhakikisha tamasha hilo linafanyika kwa miaka 44 mfululizo, akisema hatua hiyo inaonesha dhamira ya kuendeleza sanaa na utamaduni nchini.

Amewahamasisha pia wananchi wa Bagamoyo na Watanzania kwa ujumla kujitokeza kwa wingi katika matamasha yajayo ili kuwaunga mkono wasanii na kutambua mchango wao katika kukuza sanaa nchini.