UJUMBE kutoka nchini Korea ya Kusini umetembelea Taasisi ya Sanaa na Utamaduni Bagamoyo (TaSUBa)

Posted on: April 26th, 2023

UJUMBE kutoka nchini Korea ya Kusini umetembelea Taasisi ya Sanaa na Utamaduni Bagamoyo (TaSUBa) leo April 26, 2023 na kuahidi kutoa mchango mkubwa katika kuiimarisha Taasisi hiyo hasa katika utoaji wa mafunzo ya filamu.

Korea ya Kusini kupitia Serikali ya Jiji la Busan imesaini makubaliano na Serikali ya Tanzania kupitia Wizara ya Utamaduni Sanaa na Michezo yakisimamiwa na Bodi ya Filamu Tanzania ili kuweza kusaidia kuimarisha Tasnia ya Filamu na kuanzisha Shule ya Filamu nchini (Film Academy).

Akizungumza wakati wa ziara hiyo Mkuu wa Taasisi ya Sanaa na Utamaduni Bagamoyo (TaSUBa) Dkt. Herbert Makoye amesema ushirikiano kati ya Korea ya Kusini na Tanzania utakua wa manufaa makubwa kwa Taasisi hiyo na Tasnia ya Filamu nchini kwa ujumla.

"Tuna uhakika wataalam watakuja kutoka Korea na watakuja pia kutusaidia kufundisha vijana wetu hapa TaSUBa," amesema Dkt. Makoye.

Dkt. Makoye ametoa wito kwa wadau wa tasnia ya filamu nchini kujiandaa kwa ajili ya fursa za mafunzo mara zitakapotokea ili kupata ujuzi zaidi na utaalam kutoka kwa wabobezi hawa kwa sababu ina tija kubwa katika tasnia hasa katika utengenezaji wa filamu zilizo na ubora unaokubalika na zenye ushindani katika soko la ndani la nje ya nchi.