NIDHAMU NI MSINGI WA MAFANIKIO KWA MSANII

Posted on: June 22nd, 2026

MKUFUNZI katika Taasisi ya Sanaa na Utamaduni Bagamoyo (TaSUBa), Bi. Beatrice Taisamo, amesema kuwa nidhamu katika kazi ni moja ya nguzo muhimu zinazo mwezesha msanii kukua kitaaluma na kuzalisha kazi zenye ubora unaokubalika.Akizungumza kuhusu safari yake ya sanaa, Bi. Taisamo alieleza kuwa msanii mwenye nidhamu huipa kazi yake muda, heshima na nguvu zote zinazohitajika ili kufikia malengo aliyojiwekea. Anaongeza kuwa nidhamu humsaidia msanii kushirikiana vyema na wenzake, jambo ambalo huongeza ufanisi na mafanikio katika kazi za pamoja.Bi. Taisamo pia alibainisha kuwa aliamua kujiunga na TaSUBa kwa lengo la kunoa na kukuza kipaji chake cha uigizaji baada ya kugundua kuwa alikuwa na uwezo mkubwa katika sanaa hiyo. Kupitia mafunzo aliyoyapata chuoni hapo, ameweza kuimarisha ujuzi wake na hatimaye kuwa miongoni mwa walimu wanaochangia kuibua na kuendeleza vipaji vya wasanii chipukizi nchini.